「喂，專家！」很久沒見的小學同學傳來whatsapp。

「你......係咪send 錯呢」

「唔係呀，有嘢請教你。我個女就嚟一歲，呢排晚晚半夜兩三點喊醒搵媽媽......我老婆冇覺好瞓，完全唔知咩事。」

「呢排有冇咩客觀環境改變？」

「冇。」

我再問屋企是否很潮濕？是否出牙？有沒有作病？太熱太凍？將我所知幼兒半夜驚醒的原因都問過，答案都是「No」，案件進入膠著狀態。

「呀，呢排少咗喺屋企食飯，算唔算客觀環境改變？平時通常我煮飯，但呢排忙，多數喺出面食埋先返。」

「梗算啦，好大改變添呀。」我忽然星星眼，因為這位爸爸終於提供到一個能突破案情的口供。

香港很多大人，都是曱甴。 曱甴的特性是生命力頑強：

屋企食又得，出街食又得，唔食都得；

瞓十個鐘又得，瞓少D 亦冇話唔得；

呢頭話咁樣，轉頭又話改，冇所謂；

總之，乜都得，好有彈性，仍然生存到就得。

但孩子不是這樣。

嬰幼兒處於秩序敏感期，生活的秩序是他們的重要安全感來源之一。物質環境的穩定、照顧者的穩定、時間的穩定等，都有助嬰幼兒建立安全感。有了安全感，他們就會有穩定的情緒，各方面也能正常運作。一旦這些規律出了亂子，孩子就會在一些外顯行為上告訴你：有些東西搞錯了。若不處理，情況就會持續，其他倒退行為也可能出現。

但頑強的曱甴（大人），通常都察覺不到生活的規律有任何改變 : 有食呀，有瞓呀，有痾呀，有玩呀，人都齊呀，有咩唔同咗？

一向在家由爸爸煮晚飯，變成天天在外面吃。對大人來說，都是吃；對孩子來說，就好像移民去了第二個國家吃。將生活中小小的改變放大好多倍，你就會明白孩子不安的心情。

然後，孩子日間有甚麼壓抑的情緒，埋藏的心事，累積的焦慮，通常就在入睡後跑出來（大人也有此情況吧）。半夜驚醒，自然就要補充安全感─找爸爸媽媽─來填補那個不安的洞洞，一個消磨意志的故事就此展開......

「咁即係要喺返屋企食飯？」他問。

「其實都係斷估，唔知係咪一定係呢個原因。但既然冇頭緒，就試下啦，唔得先再算。不過你預未必咁快見效，試幾日睇下點。」

十日後，阿豬媽才記得要跟進。

「喂，點呀你個女。」

「回復正常了。嗰兩日係不停話佢知爸爸煮飯啦洗碗啦，俾佢坐係門口睇，做返平日放工一樣，真係第三日就回復正常。」

「恭喜晒。」

嬰幼兒的「失常」，大部分原因來自「無常」。若求醫問卜抓破頭皮後仍未找到孩子失常原因，不妨將心比己，想想近來有沒有甚麼小小改變，有機會打亂了孩子的秩序？可能回家煮兩餐飯，講兩個故事，專心跟孩子玩，已能讓大家重回正軌。

--阿豬媽

想知道更多阿豬媽與阿豬爸的育兒心得，可以follow【湊仔爸與返工媽】Facebook喔！

Cover Photo: Google